Showing posts with label கோயில்கள். Show all posts
Showing posts with label கோயில்கள். Show all posts

Monday, August 27, 2018

அறியப்படாத கோயில்கள் - 5

கூத்தப்பார் மருதீஸ்வரர் கோவில்


திருச்சி திருவெறும்பூரில் இருந்து  சுமார் 8 கிலோமீட்டர் தொலைவில் இக்கோவில் அமைந்துள்ளது. கல்வெட்டுகளில் இவ்வூர் கூத்தபெருமாள் நல்லூர் என்று அழைக்கப்படுகிறது.
இவ்வூர் இறைவன் மருதீஸ்வரர் என அழைக்கப்படுகிறார். இன்று இவ்வூர் கூத்தப்பார் என்று அழைக்கப்படுகிறது .

 இக்கோவிலில் உள்ள கோபுரம் மிக பிரமாண்டமாக அமைந்துள்ளது.  இக்கோவிலில்  மூன்றாம் ராஜராஜனின் 29வது ஆட்சியாண்டு கல்வெட்டு களில் 3 கிடைக்கப்பெற்றுள்ளன. கல்வெட்டுகளில் இவ்வூர் பாண்டிய குலாசனி வளநாட்டு மீகோழை நாட்டுக்கூத்து பெருமாநல்லூர் என்று குறிக்கப்படுகிறது. மேலும் தற்சமயம் புதியதாக பெருமண்டபம் கிழக்கு வடக்கு தாங்குதளத்தில் இரண்டாம் தேவராயர் கல்வெட்டு ஒன்று கண்டறியப்பட்டுள்ளது.

 இக்கோவிலில் அளவை கல்வெட்டுகள் இடம் பெற்றுள்ளன. முன் மண்டபம் கிழக்கு சகதியில் புஞ்சை நஞ்சை என்ற இரண்டு குறிப்புகளுடன் மூன்று பாடல்கள் இடம்பெற்றுள்ளன இவ்வெழுத்து குறிப்புகள் 14 அல்லது 15 ஆம் நூற்றாண்டு குறியவையாக இருக்கலாம். கூட்டல் குறிக்கும் இரண்டுக்கும் இடையே  7.31 மீட்டர் இடைவெளி உள்ளது. அக்காலத்தே இப்பகுதியிலிருந்த நன்செய் நிலங்களை அளக்க பயன்படுத்திய நிலம் அளந்த அளவுகோலாகக் இதனை கொள்ளலாம். இக்கோவிலின் முதல்கல்வெட்டு கோவில்களுக்கிடையே நிகழ்ந்த இடப்பரிமாற்றம் பற்றி பேசுகிது. குலோத்துங்கசோழ வளநாட்டு திருப்பனையூர் நாட்டு சோமநாதபுரத்திலிருந்த சோமநாதர், விசுவேசுவரர், ஆகிய கோவில் தானத்தார் மற்றும் அவ்வூரின் மற்றொரு கோவிலான கவிவேதிசுவரர் கோவில் தானத்தாரும் இணைந்து தங்கள் கோவிலின்  பதிமூன்றே முக்கால் வேலி நிலத்தை  கொடுத்துள்ளனர். இக்கோவிலின் ஈசனுக்கு திருநாமத்துக்காணியாக பரிவர்த்தனை செய்து கொடுத்துள்ளனர்.

அப்படியளிக்கப்பட்ட நிலம் உலகனான விஜயாலய முத்தரையர் என்பவரால் கொடையளிக்கப்பட்டதாகும். மேலும் இச்சாசனம் சோமநாதர், திருநெடுங்களத்திலும் உள்ளது. மற்ற இரு கல்வெட்டும் நிலம் பரிமாற்ற தொர்பாய் உள்ளது. இக்கல்வெட்டில் குறிக்கப்படும் ஊர்கள் இன்றும் இப்பெயரிலேயே அழைக்கப்பட்டு வருகிறது.அவையாவன :
உப்பூரிக்குடி, திருநெடுங்களம், திருவையாறு,  மாங்குடி, மருதூர், கிளியூர்,  வலவூர், பாகன்குடி.

இக்கோவிலில் உள்ள முன்மண்டபத்தில் பவழசபை  என்று அழைக்கப்படும் 12 தூண்கள் காணப்படுகின்றன தூண்கள் ஒவ்வொன்றும் முச்சதுர இருகட்டுத் ஒன்றாக அமைந்துள்ளது. தூண்கள் ஒவ்வொன்றிலும் ஒவ்வொரு வாத்தியக் கருவியை வாசிப்பது ஐதீகம்.

மேலும் இக்கோவிலில் உள்ள திருமஞ்சன நீர்வழி  என்னும் கோமுகை  மிகவும் பிரசித்தி பெற்றது. கீழே உள்ள சதுர தொட்டியின் மேல் புறம் ஒரு சிங்கத்தின் வாயில் இருந்து நீர் வெளிப்படும் வண்ணம் அமைக்கப்பட்டுள்ளது. இதன் இரு பக்கவாட்டுகளிலும் பூதகணங்களை கொண்டுள்ளது. பணையோலைக் குண்டலங்கள், சரப்பள்ளி, உதரபந்தம்,  போன்றவை  அமையப் பெற்று பூதகணங்கள் மிகவும் அழகுற அமைந்துள்ளன. கிழக்குப் புறம் உள்ள பூதகணம் சிரட்டைக் கின்னரி வாசிப்பது போலவும்,  மேற்குபுறமுள்ள பூதம் வீணையை வாசிப்பதாகவும் உள்ளது. இவ்வழகிய கோவில் தமிழக அரசால் நிர்வகிக்கப்பட்டு வருகிறது. நன்முறையிலமைந்த கோவில் இன்னும் அருகேயுள்ள மக்களுக்கு தெரியாமலுள்ளது வருத்தத்திற்குரியது. இவ்வூரில் ஜல்லிக்கட்டு மிகவும் புகழ்பெற்றது. அதனைபோலே இக்கோவிலும் புகழ்பெற வேண்டும் என்பதே நம் அவா.




Friday, July 27, 2018

கல்வெட்டுக் கோயில்கள் - 2


திருக்கோடிக்காவல் கோவிலமைப்பு குறித்து சென்ற பதிவில் கண்டோம் இனி இக்கோவிலின் முக்கிய கல்வெட்டுச் செய்திகளைக் காண்போம்.

கல்வெட்டு 1:
கோயில் உண்ணாழிகைத் தென்புறச் சுவரிலுள்ள  பல்லவ மன்னன் நந்திவர்மரின் பத்தொன்பதாவது  ஆட்சியாண்டுக் கல்வெட்டு. (பழங்கல்வெட்டில் இருந்து படியெடுக்கப்பட்டது)
கல்வெட்டு அறிக்கை : (ARE.37 of 1931)
கல்வெட்டுச் செய்தி:
திருக்கோடிக்காவிலிருக்கும் சிறுநங்கை ஈஸ்வரம் எனும் கோவிலில் நுந்தா விளக்கெரிப்பதற்காக ஆழிற்சிறியன் என்பவன் மூலதனமாக வைத்த நூறு களம் நெல்லினை இக்கோயிலில் வழிபாடு நடத்தி வரும் ஆத்திரையன் நாராயணன் ஏறன் மற்றும் அவனது தம்பியர் மூவரும் பெற்றுக் கொண்டு அதில் வரும் வட்டியிலிருந்து விளக்கிற்கு உழக்கு நெய்யளிக்க ஏற்ற செய்தியை அறிகிறோம்.

கல்வெட்டு 2:
கோயில் முன்மண்டபத்தில் தென்புறம் அதிட்டானம், குமுதம், ஜெகதியில் உள்ள பல்லவ மன்னன் நிருபதுங்கவர்மரின் இருபத்தியிரண்டாம் ஆட்சியாண்டுக் கல்வெட்டு. (பழங்கல்வெட்டில் இருந்து படியெடுக்கப்பட்டது)
கல்வெட்டு அறிக்கை : (ARE.38 of 1931)
கல்வெட்டுச் செய்தி:
பல்லவ மன்னன் நிருபதுங்கவர்மரின் மனைவி  வீரமகாதேவியார் ஹிரண்யகர்ப்பம் மற்றும் துலாபாரம் என்ற இரு வேள்விகளைச் செய்து அதிலிருந்து திருக்கோடிக்கா மகாதேவர்க்கு அளித்த 50 கழஞ்சு பொன்னில் 25 கழஞ்சில் வரும் வட்டியிலிருந்து நாள்தோறும் இருநாழிகை அரிசியும் ஒரு பிடி நெய்யும் கொடுக்க வேண்டுமெனவும், நொந்தா விளக்கெரிக்க நாள்தோறும் உழக்கு நெய்யினை அளிக்க வேண்டுமெனவும் மேலும் இப்பணியை ஊர்ச் சபையார் நிறைவேற்றவும் பணிக்கப்பட்ட செய்தியை இக்கல்வெட்டின் மூலம் அறிகிறோம்.

கல்வெட்டு 3:
கோயில் உண்ணாழிகை மேற்குப்புற அதிட்டானத்தில் உள்ள முற்கால பாண்டியரான கோமாறஞ்சடையனின் நான்காம் ஆண்டு கல்வெட்டு.
கல்வெட்டு அறிக்கை :  (ARE.21 of 1930-31)
கல்வெட்டுச் செய்தி:
இக்கோவில் இறைவனுக்கு நந்தாவிளக்கு எரிக்க பேரையூர் நாட்டு பனையூர் அரையன் கள்வன் என்பவர் பதினைஞ்சு கழஞ்சு பொன்னளித்துள்ளார்.
இதற்கு வட்டியாக பிழையாநாழி என்ற நாழியின் அளவுப்படி உழக்கு நெய்யினை, திருக்கோடிக்கா நாராணக்க சதுர்வேதிமங்கல சபையார் கொடுப்பதாக உறுதியளித்துள்ளனர்.

கல்வெட்டு 4:
கோயில் முன்மண்டபத்தில் தென்புறம் அதிட்டான ஜெகதியில் இளங்கோ முத்தரையரின் 13 ஆம் ஆட்சியாண்டுக் கல்வெட்டு.
கல்வெட்டு அறிக்கை : (ARE.38 of 1931)
கல்வெட்டுச் செய்தி:
இக்கல்வெட்டு சிதைந்துள்ளது. இம்முத்தரையரின் காலத்திலே நாட்டு மன்றாடிகள் 50 ஆடுகளும் வேறொருவர் 100 ஆடுகளும் இக்கோயிலிறைவனுக்கு விளக்கெரிக்க தானமாக அளித்த செய்தியைக் குறிக்கிறது.

Friday, July 20, 2018

கல்வெட்டுக் கோயில்கள்-1

திருக்கோடிக்கா


தேவாரம் பாடப்பெற்ற காவிரி வடகரைத் தலங்களிலே 37 வது கோவிலாகிய திருக்கோடிக்காவானது மாயவரத்திலிருந்து கதிராமங்கலம் செல்லும் சாலையில் 12 கி.மீ தொலைவில் அமைந்துள்ளது. இவ்வூர் கல்வெட்டில் வடகரை பிரம்மதேயம் நல்லாற்றூர் நாட்டு திருக்கோடிக்காவாகிய கண்ணமங்கலம் என அழைக்கப்பட்டுள்ளது.

ஐந்துநிலை கோபுரம் கொண்ட அழகியத் திருக்கோவில். விமானம் திராவிட வகையினைச் சார்ந்தது. பிற்காலக் கட்டுமானத்தால் கோவில் தளம் உயர்த்தப்பட்டு அதிட்டானம்  மறைந்துள்ளது. மேலும் கருவறையைச்சுற்றிய பிற்கால கட்டுமான சுவற்றால் அங்குள்ள அழகிய கோட்டச் சிற்பங்களை முழுமையாக ரசிக்க முடியாத நிலையுள்ளது.

கோவிலின்  தென்புற சுவற்றில் காரைக்கால் அம்மையாருடன் மகளிர் ஒருவர் வணங்குவது போன்ற ஆடல்வல்லான்  சிற்பமுள்ளது,  தென்புறக் கோட்டத்தில் அழகிய ஆலமர் செல்வன் சிற்பம் அழகாக உள்ளது, பிற்காலச் சிலையின் ஆக்கிரமித்தல் காரணமாய் முன்னவர் மறைக்கப்பட்டுள்ளார்.
மேற்புறக் கோட்டத்தில் அடிமுடி காணா அண்ணல்  சிற்பமும், வடபுறக் கருவறைக் கோட்டத்தில் நான்முகன் சிற்பமும், வடபுற அர்த்தமண்டபக் கோட்டத்தில் அரிகண்ட, நவகண்ட வீரருடன் கூடிய கொற்றவைச் சிற்பமும் அழகாய் செதுக்கப்பட்டுள்ளன.

திருச்சக்கரப்பள்ளியில் உள்ளவாறு அரசமகளிர் ஈசனை வணங்குவது போன்ற சிற்பம் செதுக்கப்பட்டு முழுமையடையாது உள்ளது. (இக்கோவிலில் செம்பியன்மாதேவி திருப்பணி செய்ததாக கல்வெட்டுள்ளது. இச்சிற்பம் அவராகவும் இருக்கலாம்?)
வேதிபத்ர உபபீடத்தில் சிவபுராணம், இராமயண காட்சிகள் குறுஞ்சிற்பங்களாய் அழகுறச் செதுக்கப்பட்டுள்ளன. மேலும் நாட்டிய மகளிர், குடக்கூத்துச் சிற்பங்களும் செதுக்கப்பட்டுள்ளன.

கல்வெட்டுகளை பொருத்தமட்டில் மூன்றாம் நந்திவர்மன், நிருபதுங்கவர்மன், பராந்தகர், உத்தமசோழர், இராஜராஜசோழன், இராஜேந்திரர், விக்ரமசோழன், குலோத்துங்கன், மூன்றாம் ராஜராஜர், கோமாறஞ்சடையன், கோவிளங்கோ முத்தரையர், காடவர் கோன் கோப்பெருஞ்சிங்கன் கல்வெட்டுகள் என  இக்கோவிலில் மொத்தம் 48 கல்வெட்டுகள் உள்ளன. பல்லவர் காலம் தொடங்கி கோப்பெருஞ்சிங்கன் காலம் வரை இக்கோவில் மேன்மைபெற்று இருந்துள்ளது.

இக்கோவிலைப் பற்றியும், இறைவழிபாடு பற்றியும், நிலவிற்பனை, நிலவெல்லை பற்றியும் தெரிந்து கொள்ள இக்கோவிலின் கல்வெட்டுகள் பெரிதும் துணைபுரிகின்றன.
முதலாம் இராஜராஜர் காலத்தில் 'சூரியதேவர்' கோவிலொன்று இருந்தது தெரிய வருகிறது.

கல்வெட்டுகளில் சில பெயர்கள் தமிழ்ச்செறிவோடு காணப்படுகின்றன. உதாரணமாக 'பிழையாநாழி' என்றொரு அளவுக்கருவியும், 'புதுவாய்க்காலுக்கு நின்று போந்த உட்சிறுவாய்க்காலுக்கு கிழக்கு ' என்ற நில எல்லையும், 'தளி அர்ச்சிப்பான்' என்று கோவில் வழிபாடு செய்வோரும்,  'தீப்போர்க்குச் செம்பொன்' என்ற தீயில் புடம்போட்ட தங்கமும் குறிப்பிடபடுவது கருத்தைக் கவருவதாக உள்ளது.

இவ்வூரில் முன்பிருந்த பழமையான கோவிலை மாற்றி கற்கோவிலாக அமையப்பெற்ற போது முன்பு அக்கோவிலில் காணப்பட்ட கல்வெட்டுகளையெல்லாம் மீண்டும் புதிதாக அக்கோவிலில் கல்லில் வெட்டியிருப்பதை இங்குள்ள கல்வெட்டுகள் மூலம் அறியமுடிகிறது. பண்டைய மக்கள் கல்வெட்டுகளை முக்கிய ஆவணங்களாக போற்றி பாதுகாத்ததை இதன்மூலம் உணரமுடிகிறது.

சிறு சிறு பகுதிகளாக அக்கல்வெட்டு செய்திகளை இனி காண்போம்.
தொடரும்.......

Saturday, July 14, 2018

அறியப்படாத கோயில்கள் - 3

அல்லூர் நக்கன் கோவில்:

திருச்சி - கரூர் புறவழிச்சாலையில் சுமார் 10 கி.மீ தொலைவில் உள்ள ஓர் ஊர் அல்லூர். ஊரின் முன்னே பஞ்சநதீஸ்வரர் ஆலயம் என்ற சோழர் கால கோவிலுள்ளது. நாம் காண இருக்கும் கோவிலானது இக்கோவிலைக் கடந்து இடப்புறமாக ஊரின் உள்ளே மேலும்  2கி.மீ சென்றால் ஊரின் ஒதுக்குபுறம் வயல்வெளிகளினிடையே அமையப்பெற்ற கோவிலாகும்.

பிரதோஷம், சிவராத்திரி தவிர மற்ற நாட்களில் ஈசனுக்கு அபிஷேகம் இல்லை. எந்நேரமும் கோவில் பூட்டியே இருக்கும்.
பாம்பு மற்றும் கதண்டு வண்டுகளின் தொல்லை உண்டு காண விரும்புவோர் கவனமாய் செல்லவும். இந்நாளில் பசுபதீஸ்வரர் என்றழைக்கப்படும் இக்கோவில் அந்நாளைய கல்வெட்டின்படி உறையூர் கூற்றத்து அல்லூரான அல்லூர் நக்கன் பரமேஸ்வரர் கோவில் என அழைக்கப்பட்டுள்ளது.

இக்கோவிலிலுள்ள 17 ம் ஆட்சியாண்டு இராஜகேசரி முதலாம் ஆதித்தன் என கருதப்படுகிறார். மேலும் பராந்தகரின் 17,18,37,40,41ம் ஆட்சியாண்டு கல்வெட்டுகள் கிடைக்கின்றன.
இக்கல்வெட்டுகளில் கோவிலின் நிலதானங்கள், எல்லைகள் குறிக்கப்பட்டுள்ளன. அரிஞ்சயர் கல்வெட்டில்  அவரது அதிகாரியான வீரசோழ இளங்கோவேள் என்கிற பராந்தக குஞ்சரமல்லன் குறிக்கப்படுகிறார். இவரின் மனைவி கங்கமாதேவியார் உடன்கட்டை ஏறி இறக்கிறார். இக்குறிப்புடன் இவர்  அளித்த 20 கழஞ்சு பொன் கல்வெட்டில் வெட்டப்பட்டுள்ளது. அரிஞ்சயரின் மற்றொரு கல்வெட்டில் மும்முடிசோழ இளங்கோவேளார் அளித்த தானம் குறிப்புள்ளது.

கண்டராதித்தரின் கல்வெட்டில் புதுக்குடி என்ற ஊரிலுள்ள நிலத்தினை இறையிலியாக அளித்த குறிப்பு வருகிறது.

மேலும் 'மதிரை கொண்ட ராஜகேசரி' சுந்தரசோழரின் 17ம் ஆட்சியாண்டு கல்வெட்டு அவர் அளித்த தானத்தினை குறிக்கிறது.

மாறவர்மன் குலசேகர பாண்டியனின் 24 ம் ஆண்டு கல்வெட்டில் இக்கோவில் இறைவன் நக்கீஸ்வரமுடைய நாயனார் என குறிக்கப்படுகிறார். இக்கோவில் ஏகதள கற்றளி அமைப்பை சார்ந்தது. கோவிலின் மகாமண்டபம் பிற்காலத்தியது. கோஷ்ட சிற்பங்கள் கோவிலின் உள்ளே வைக்கப்பட்டுள்ளன.

இக்கோவிலின் வெளிபுறம் அருகேயுள்ள சிறுதெய்வ கோவிலில் பழமையான அய்யனார் சிற்பம் ஒன்றும் காணப்படுகிறது.

Thursday, July 12, 2018

அறியப்படாத கோயில்கள் - 2


திருச்சிக்கு தெற்கே சுமார் 18 கி.மீ தொலைவில் அமைந்துள்ள சிற்றூர் அழுந்தூர். இவ்வூரில் வரகுணஈஸ்வரம் என்ற பழம்சிவன் கோவில் உள்ளது. இங்குள்ள கல்வெட்டுகள் இவ்வூரை அழிந்தியூர் என்றே குறிக்கிறது. முற்கால பாண்டியர் பெயரால் அழைக்கப்பட்ட இக்கோவில் கல்வெட்டுகள் சமீபத்தில் தமிழ் பல்கலைக் கழத்தினரால் படியெடுக்கப்பட்டது.

அங்குள்ள முதல்குலோத்துங்கனின் 48 ம் ஆட்சியாண்டு கல்வெட்டு இவ்வூரை 'இரட்டபாடி கொண்ட சோழவளநாட்டு உறத்தூர் கூற்றத்து திருஅழிந்தியூர் ' என குறிக்கிறது. மேலும் மாறவர்மன் குலசேகரனின் 38ம் ஆண்டு கல்வெட்டில் இவ்வூரானது 'வடகோனாட்டு அழிந்தியூர்' என குறிக்கப்படுகிறது. மற்றொரு கல்வெட்டில் அவ்வூரில் வாழ்ந்த காடையன் வலையன் குற்றிச்சேந்தன் ஆன பெரியநாட்டு முத்தரையன் அவ்வூருக்கு உரிமையுடைய காணியாளனாக குறிக்கப்படுகிறான்.

இதுவரையில் முத்தரையர்கள் போரில் பகைவரை வென்ற இடங்களில் ஒன்றாகிய அழிந்தியூர் என்ற  ஊரினை தஞ்சை மாவட்டத்திலுள்ள 'தேரழுந்தூர்' எனக் கொண்டிருந்தனர் (இதை ராகவையங்கார் எழுதியுள்ளார்). இந்நாளில் அக்கருத்து மாறுபட்டுள்ளது. அழுந்தூர் வேறு அழிந்தியூர் வேறு என்றும், இக்கோவில் கல்வெட்டுகளில் தெளிவாகக் குறிப்பிடப்படும்  இத்திருஅழிந்தியூரே போர் புரிந்த ஊராக  இருக்க வேண்டுமென்றும் ஆய்வாளர்கள் கருதுகின்றனர். தற்சமயம் சில உள்ளூர் கொடையாளர்களால் இக்கோவில் பராமரிக்கப்படுகிறது.






Wednesday, July 4, 2018

அறியப்படாத கோயில்கள்-1

திருச்சி -மதுரை புறவழிச்சாலையில் விராலிமலையிலிருந்து சுமார் 2 கி.மீ தொலைவில் அமைந்துள்ள சிற்றூர் விராலூர். புறவழிச்சாயிலிருந்து இடதுபுறம் சென்றால் சிறிது தொலைவில் இவ்வழகிய கற்றளி அமைந்துள்ளது.

இக்கற்றளி முற்கால சோழர் கலைப்பாணியை கொண்டுள்ளது. நார்த்தாமலையிலுள்ளதை போல வேசரம் வகை விமான அமைப்பை கொண்ட அரிய கற்றளி.

இக்கோவிலில் கல்வெட்டுகள் எதுவும் காணப்படவில்லை. காலப்போக்கில் சிதைந்திருக்கும்.

சில சிலைகள் கோஷ்டத்திலும், பல அரிய சிலைகள் திறந்தவெளியிலும் உள்ளன. அரசின் நிதியுதவி பெற்று தற்சமயம் ஒருகால பூஜை நடைபெற்று வருகிறது. மற்ற நேரங்களில் கோவிலானது பூட்டியே கிடக்கிறது.  இறைவன் பூமிநாதர் என அழைக்கப்படுகிறார்.

கட்டிடக்கலை பற்றி அறிய விழையும் மாணவர்கள், மரபுநடை பயணங்கள் செல்லும் ஆர்வலர்கள், இக்கோவிலையும் அவசியம் காணவேண்டும்.